خالد فعلا ممكن يكون توفي نتيجة اسفكسيا ؟؟؟

تعالو نشوف مع بعض سبب موت خالد محمد سعيد

نظرة طبية تفصيلية لصورة وجه خالد شهيد تعذيب الشرطة بالاسكندرية لتكذيب ادعاءات وزارة الداخلية

الشهيد خالد طبعا زي ماكلنا عارفين ,كان تقرير الطب الشرعي في حالته هي اسفكسيا (اختناق) وفسروها بسبب وجود لفافة البانجو في القصبة الهوائية

خالد فعلا ممكن يكون توفي نتيجة اسفكسيا بس هل نتيجة لفافة البانجو؟؟؟

تعالو نشوف تعريف كلمة اسفكسيا:

الاسفكسيا تعنى الموت خنقا أو غرقا أو بأى طريقة لها علاقة بمنع دخول الهواء للجسد سواء كانت مرضيه او عرضيه أو انتحارية او جنائية

ولذلك فهى تتطلب الحرص الشديد وعدم التسرع فى إبداء الراى عن كيفية حدوثها قبل استبعاد أى كيفية أخرى

جميل جدا, ده معناه ان ليها اسباب كتير غير وجود جسم غريب (اللفافة) وممكن يكون سببها كسر مثلا

هاشرح الموضوع بالتفصيل علي صورة خالد الله يرحمة


[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذا الرابط]



هنا في الصورة انا مشاور علي كل علامة و هاكتب مدلولها من انواع الكسور

واعذروني لان الكلام ده مش عارف ترجمته بالعربي فهاحاول ترجمته بصورة مبسطة علي حد مقدرتي

طبعا انا هاكتب كل الاحتمالات لان الصورة مش كفاية لتشخيص محدد لنوع الكسر

رقم 1 عندنا فيه جزء من الوجه مقعر للداخل

ورقم 2 جزء بارز محدب للخارج وواضح جدا امام الاذن

الجزء المحدب للخارج البارز ده هو رأس عظمة الفك السفلي المشاركة في مفصل الفك

وده ناتج عن خروجها من المفصل للخارج

وده فيه احتمالين

اما كسر في رأس العظمة وفصلها عن الفك وخروجها خارج المفصل

او ازاحة للعظمة خارج المفصل بدون كسرها

والمرجح هو كسرها

رقم 3 هنلاقي ان الحد السفلي لجسم الفك السفلي من اليمين بارز

وده نتيجة واحد من احتمالين: - الكسر السابق في الجهه اليسري هيخلي عضلات الوجه تشد الجهه اليمني للخارج لليمين وتظهر بارزة كما سبق

او

-نتيجة كسر في جسم الفك السفلي

رقم 4 واضح ان فيه جرح في الدقن

وواضح انه مرتطم بحافة صلبة غير حادة نتج عنه كدمة

الضربة اللي في الدقن دي ممكن تعمل انواع كتير من كسور الفك

وبتكون اما مباشره ( يعني في مكان الضربة) في الذقن او علي جانبيها

او غير مباشرة ( يعني في غير مكان الضربة ) مثلا في مفصل الفك في جانب واحد او المفصلين علي الجانبين

رقم 5 دي علامة مهمة جدا وهي ان العضة الامامية للاسنان مفتوحة

ودي برضه بتحتمل انواع كتير من الكسور

منها الكسرين السابق ذكرهم الناتجين عن ضربة الدقن

رقم 6 جرح قطعي واضح في الشفه السفلي

وده غالبا نتيجة الضربة اللي في الدقن وزنق الشفه السفلي مابين الجسم الصلب والسنان السفلي الامامية

طبعا ممكن يكون كمان فيه كسر في الفك العلوي و ممكن يكون دليله هو العلامة رقم 5
--------------------------

من الكسور السابق ذكرها فيه 3 كسور ممكن يعملوا اسفكسيا اذا لم يراعي اسعافهم بصورة طارئة وصحيحة

- كسر مفصلين الفك علي الجانبين

-كسر علي جانبي الدقن

وده نتيجة شد اللسان للخلف وغلقه لمجري الهواء او بالبلدي(بلع اللسان)

-كسر عظمة الفك السفلي وانفصالها عن العظام الأخري

قبالتالي فعلا خالد ممكن يكون توفي نتيجة اسفكسيا ولكن بسبب الكسور وليس لفافة البانجو
------------------------

طبعا لو مش اسفكسيا ففيه احتمالات نزيف داخلي بالمخ وواضح ان الضربات كانت قوية جدا وممكن تعمل نزيف بالمخ وكسر بعظام الجمجمة

--------------------------

وطبعا علشان ننفي حوار ان الصورة اخذت قبل التشريح او بعد فبكل بساطة

اولا :التشريح من مشارق الارض لمغاربها لا يفتح في الوجه

لانه بكل بساطة لا يهمة شيء في الوجه

ولكن يفتح في الجمجمة من الخلف ليخرج المخ ويري ماذا حدث بداخل الجمجمة او اخذ عينة من المخ وتحليلها

ويفتح ايضا من الصدر لاسفل البطن علي شكل حرف واي ليري اذا كان هناك شيء غريب بالداخل ولبأخد عينات من مختلف الاعضاء وتحليلها لمعرفة سبب الوفاة

ثانيا وده الاهم: اي تشريح بيفتح في مكان بيخيطوه بغرز بعد التشريح

وثالثا : جروح التشريح في خطوط مستقيمة واضحة الملامح

ورابعا : جروح التشريح لا تسبب كدمات او زرقان

وفي اسفل الموضوع صورة لجرح تشريعي بعد خياطته لمعرفة شكله

وفيديو تشريح جثة انثي لمعرفة وتأكيد شكل التشريح وعدم علاقته بالوجه(انا وضعتهم في اخر الموضوع علشان مش كل الناس تشوفهم وياريت اللي بتدايقه المناظر دي ما يشوفهاش )

انا حبيت بس من خلال الموضوع ده اوضح للناس البسيطة قد ايه وزارة الداخلية عاوزه تستعبطنا سواء من خلال نفي الصورة وانها بعد التشريح او من خلال نفي الكسور

او من خلال القول بان السبب للاسفكسيا هو لفافة البانجو

انا طبعا فسرت الكلام ده من خلال دراستي لجراحة الفكين والكسور واتمني اني اكون قدرت اترجم الكلام للعربي بشكل جيد ومبسط

وانشاء الله حق خالد مش هيضيع طول ماكل واحد بيعمل اللي بيقدر عليه بشكل ايجابي لان خالد مش مجرد شاب مصري

خالد هو رمز للانسان المصري اللي بيتعرض للتعذيب نتيجة قهر جهاز الشرطة

ربنا يرحمك يا خالد[ندعوك للتسجيل في المنتدى أو التعريف بنفسك لمعاينة هذا الرابط]

لا اله الا اله

ليه كده يامكس

انا قلبى وجعنى

الله يسامحك

عادى انت ف مصر مش معقول يطلعوا الشرطه اللى عملت كدا لازم يطلعوه هو اللى كان مش كويس ويياخد مخدرات

وهما ملهومش ذنب هو اللى موت نفسه